Hjá Origo starfar öflugur hópur fólks sem nýtir hugvit sitt til að efla árangur, hagsæld og öryggi viðskiptavina. Markmið okkar í mannauðsmálum er að verða eftirsóttasti vinnustaðurinn og laða þannig að fyrirtækinu hæfasta starfsfólkið til frambúðar. Til að ná því markmiði höfum við sett okkur metnaðarfulla mannauðsstefnu sem byggir á gildunum okkar þremur, samsterk, þjónustuframsýn og fagdjörf.

Starfsfólk og stöðugildi

Fjöldi stöðugilda voru 445 í lok árs 2019 og fjöldi starfsmanna 479, þar af átta á starfsstöð Origo í Serbíu. Hjá dótturfélögum Origo var fjöldi starfsmanna hjá Applicon í Svíþjóð 52 í lok árs, 24 hjá Tölvutek og 7 hjá Unimaze, þar af 4 í Serbíu.

Kynjahlutfall hjá Origo skiptist þannig að 22% starfsmanna eru konur og 78% karlar. Það hefur loðað við upplýsingatæknigeirann að karlar hafa verið í meirihluta en Origo hefur einsett sér, með skýrri stefnu og framkvæmdaáætlun jafnréttismála, að vinna áfram að því langtímamarkmiði að fjölga konum innan félagsins.

Jafnlaunavottun

Origo innleiddi jafnlaunakerfi fyrirtækisins í byrjun ársins 2019. Innleiðing jafnlaunakerfisins var unnin í samræmi við jafnlaunastaðalinn ÍST 85:2012, en kerfinu er ætlað að tryggja að allar ákvarðanir varðandi laun séu teknar á sama hátt fyrir konur og karla og að þau viðmið sem lögð eru til grundvallar launaákvörðunum feli ekki í sér kynjamismunun. Origo hlaut vottun á jafnlaunakerfi sínu undir lok árs 2018 og endurnýjaði vottunina nú á árinu með viðhaldsúttekt frá BSI.

Fræðsla og starfsþróun

Öflugt fræðslustarf fer fram hjá Origo allt árið um kring. Við höfum innleitt rafrænt fræðslukerfi sem við nýtum í bland við fjölbreytt námskeið og fyrirlestra sem starfsfólk hefur kost á að sækja. Við lögðum líkt og áður talsverða áherslu á öryggisþjálfun á árinu 2019 en öryggismál eru okkur mjög hugleikin. Starfsfólk hefur því gott aðgengi að öryggisfræðslu og henni fylgt eftir.

Stjórnendaprógram var sett á laggirnar undir yfirskriftinni „Forysta til framtíðar“. Um er að ræða heildstæða námskeiðslínu sem nær yfir námsveturinn 2019-2020, byggða á stefnu og áherslum Origo. Samhliða er stjórnendum líka boðið upp á stjórnendamarkþjálfun sem hefur nýst afar vel.

Stjórnendur Origo

Finnur Oddson

Forstjóri

Finnur Oddsson er forstjóri félagsins. Hann tók við starfi aðstoðarforstjóra í nóvember 2012 og við starfi forstjóra í ágúst 2013.

Finnur starfaði um árabil sem lektor við Háskólann í Reykjavík og stýrði þar meðal annars uppbyggingu á MBA námi HR og Stjórnendaskóla HR. Hann sat í háskólaráði HR frá 2009 til 2017 og var formaður ráðsins til ársins til 2014. Finnur situr jafnframt í stjórnum Viðskiptaráðs Íslands, Distica og Startup Iceland.

Finnur starfaði um fimm ára skeið sem framkvæmdastjóri Viðskiptaráðs. Hann er með BA próf í sálfræði frá Háskóla Íslands, M.A. og Ph.D gráðu í sömu grein frá West Virginia University í Bandaríkjunum og auk þess AMP í viðskiptafræði frá IESE Viðskiptaháskólanum í Barcelona.

Dröfn Guðmundsdóttir

Framkvæmdastjóri Mannauðssviðs

Dröfn Guðmundsdóttir er framkvæmdastjóri Mannauðssviðs, en hún hóf störf hjá Origo í febrúar 2013.

Dröfn hefur mikla reynslu á vettvangi mannauðsmála. Hún starfaði sem fræðslustjóri hjá Leikskólum Reykjavíkur og síðan sem mannauðsráðgjafi á Menntasviði Reykjavíkurborgar eftir sameiningu leik- og grunnskólamála frá 2003-2007, sem mannauðsráðgjafi hjá Straumi fjárfestingabanka frá 2007-2009, fræðslustjóri Arion banka frá 2009-2011 og starfað sem mannauðsstjóri hjá Fjármálaeftirlitinu 2012-2013.

Hún lauk B.A. prófi í sálfræði frá Háskóla Íslands og framhaldsnámi í sálfræði með áherslu á vinnu- og skipulagssálfræði frá Háskólanum í Giessen í Þýskalandi.

Gunnar Zoëga

Framkvæmdastjóri Notendalausna

Gunnar Zoëga er framkvæmdastjóri Notendalausnasviðs Origo.

Gunnar hóf störf hjá TM Software árið 2003 og hefur síðan gegnt ýmsum störfum, s.s. deildarstjóri Umsjár, framkvæmdastjóri Tæknisviðs og framkvæmdastjóri Lausna og þjónustu.

Gunnar lauk BS prófi í viðskipta- og tölvunarfræði frá University of South Carolina og kerfisfræði frá Háskólanum í Reykjavík.

Gunnar Petersen

Framkvæmdastjóri Fjármálasviðs

Gunnar var fjármálastjóri Iceland Express hf. 2011-2012 og fjármálastjóri Landic Property hf. frá 2006 til 2010. Áður hafði Gunnar starfað sem viðskiptastjóri og sérfræðingur hjá HSH Nordbank í Kaupmannahöfn, Verðbréfastofunni hf. og Sparisjóðabanka Íslands hf.

Gunnar er viðskiptafræðingur frá Háskóla Íslands, M.Sc.-gráðu í fjármálum fyrirtækja frá Háskólanum í Reykjavík og löggiltur verðbréfamiðlari.

Hákon Sigurhansson

Framkvæmdastjóri Hugbúnaðarlausna

Hákon Sigurhansson er framkvæmdastjóri Hugbúnaðarlausnasviðs Origo. Hann hefur starfað hjá fyrirtækinu frá byrjun árs 2008, fyrst sem framkvæmdastjóri EMR heilbrigðislausna og síðar sem forstöðumaður Heilbrigðislausnasviðs TM Software.

Áður starfaði Hákon meðal annars sem sjálfstæður ráðgjafi, stýrði sölu- og vörustjórnunarsviði og síðar þróunarsviði Trackwell Software og var yfirmaður upplýsingatæknimála dómsmálaráðuneytisins.

Hann er með MBA-próf frá ESCP viðskiptaháskólanum í París og MSc-gráðu í rafeindaverkfræði frá Háskólanum í Álaborg.

Ingimar G. Bjarnason

Framkvæmdastjóri Viðskiptalausna

Ingimar G. Bjarnason er framkvæmdastjóri Viðskiptalausnasviðs Origo. Áður var Ingimar framkvæmdastjóri Applicon á Íslandi frá 2008. Ingimar hóf störf á hugbúnaðarsviði í febrúarmánuði 1998 og starfaði þar og síðan hjá Applicon ehf. fram til ágústmánaðar 2006. Þá tók Ingimar við sem framkvæmdastjóri Applicon Solutions Ltd. í Bretlandi.

Ingimar lauk prófi í véla- og iðnverkfræði frá Háskóla Íslands og MBA prófi frá IESE viðskiptaháskólanum í Barcelona.

Örn Þór Alfreðsson

Framkvæmdastjóri Þjónustulausna

Örn er framkvæmdastjóri Þjónustulausnasviðs Origo. Hann er með víðtæka reynslu af stjórnun og rekstri i upplýsingatækni. Hann starfaði lengi sem framkvæmdastjóri hjá EJS og síðar hjá Advania þar sem hann var ábyrgur fyrir sölu og samræmingu markaðsmála fyrirtækisins. Áður en hann hóf störf hjá Origo gegndi hann stöðu framkvæmdastjóra Glerverksmiðjunnar Samverk.  Örn situr einnig í stjórn rekstrarfélagsins Virðingar.  

Örn er viðskiptafræðingur frá Háskólanum í Reykjavík.