Samfélagsábyrgð

Stefna Origo um samfélagsábyrgð leggur áherslu á tengsl við ungt fólk, menntun og nýsköpun, sem hafa verið grunnþættir í þeim verkefnum sem félagið hefur styrkt um nokkurt skeið. Samfélagsstefna Origo byggir áfram á þessum áherslum en er einnig nánar útfærð til að taka til fjögurra meginstoða, sem eru: Mannauður, umhverfi, góðir stjórnarhættir og styrkir við góð málefni. Fjallað hefur verið um mannauð og jafnrétti í Mannauðskaflanum.

Umhverfismál

Origo hefur sett sér umhverfisstefnu sem tekur til allrar starfsemi Origo auk allra starfsmanna fyrirtækisins. Starfsmenn og stjórnendur Origo skulu kynna sér efni stefnunnar og framfylgja henni, auk þess að leita leiða til umbóta í umhverfismálum. Framfylgja skal öllum lagakröfum á sviði umhverfismála í starfsemi félagsins. Með umhverfisstefnunni skuldbindur félagið sig til að vinna markvisst að því að lágmarka neikvæð umhverfisáhrif starfseminnar.

Origo hefur sett af stað vinnu við endurskoðun á umhverfisstefnu fyrirtækisins og er ætlunin að endurskoðuð umhverfisstefna komi fram á árinu 2020 sem verður með skýrari magnbundnum markmiðum til lengri tíma.

Origo er eitt af þeim fyrirtækjum sem er aðili að Loftslagsyfirlýsingu Reykjavíkurborgar og Festu frá árinu 2015 og hefur félagið þannig skuldbundið sig til að vinna að aðgerðum sem draga úr losun gróðurhúslofttegunda og minnka myndun úrgangs. Félagið notar hugbúnað til að mæla vistspor fyrirtækisins og setja markmið í umhverfismálum fyrir fyrirtækið. Origo hvetur starfsmenn til vistvænna ferðmáta, m.a. með því að veita þeim samgöngustyrki sem stunda vistvænar samgöngur og hefur félagið sett sér sérstaka samgöngustefnu í þessum efnum. Allt sorp sem fellur til, bæði á skrifstofu félagsins, verslun, verkstæði og lager, er flokkað í viðeigandi flokkunartunnur. Félagið hefur tekið stór skref í útrýmingu einnota umbúða sem voru áður í tíðri notkun. Félagið notar eigin lausn, RentaPrent, þar sem lögð er áhersla á að draga úr sóun á pappír.

Origo hf. framkvæmir nú í fyrsta skipti heildstætt umhverfisuppgjör í samstarfi við Klappir Grænar Lausnir fyrir árið 2019. Umhverfisuppgjörið er unnið í samræmi við Greenhouse Gas Protocol (GHG Protocol) og ESG leiðbeiningar NASDAQ og hefur Origo kolefnisjafnað rekstur sinn fyrir árið 2019 með samstarfi við Kolvið (Iceland Carbon Fund).

Kolviður mun binda kolefni í gróðri og jarðvegi með landgræðslu og skógrækt á móti þeirri kolefnislosun sem á sér stað í rekstri Origo á árinu 2019. Um er að ræða losun m.a. vegna bifreiða í rekstri félagsins, húsnæðis, sorps og flugsamgangna.

Umhverfisuppgjör Origo hf. 2019

Helstu þættir í umhverfisuppgjöri Origo fyrir árið 2019

Heildarlosun gróðurhúsalofttegunda í eigin rekstri, þ.e. vegna bifreiða og húsnæðis hefur aukist um 13,5% frá árinu 2018 (umfang 1 og 2). Þar af hefur losun vegna bifreiða hækkað um 22% en losun vegna húsnæðis hefur lækkað um 11%. Helsta ástæða hækkunar vegna bifreiða er vegna fjölgunar bíla á árinu 2019 vegna aðkeyptra rekstrareininga. Unnið hefur verið að því að fækka bílum aftur síðustu mánuði. Helsta tækifæri fyrirtækisins til að draga úr losun er að fækka bílum og hætta alfarið kaupum á eldsneyti fyrir bíla. Fyrirtækið hefur sett sér þá stefnu að kaupa ekki inn bíla nema þeir noti 100% endurnýjanlega orkugjafa til lengri tíma. Hins vegar er það stefna Origo að nýta þann bílaflota sem félagið á í dag og endurnýja ekki yfir í bíla með endurnýjanlega orkugjafa fyrr en kemur að hagkvæmum útskiptitíma. Þannig verður vistspor Origo lágmarkað þrátt fyrir að heildarlosun vegna eldsneytis sé hærri en ella næstu ár.

Með aukinni gagnaöflun höfum við betri upplýsingar en áður um aðkeypta þjónustu (umfang 3). Heildarlosun vegna umfangs 3 lækkaði lítillega á milli ára. Töluverður árangur hefur náðst í að minnka losun vegna sorps eða um 29% en því miður hefur losun vegna flugferða hækkað á móti á milli ára. Meiri losun vegna flugferða skýrist að hluta til vegna fjölgunar á starfsmönnum og verktökum sem Origo starfar með erlendis. Stefna Origo er að draga úr flugferðum og nýta í meira mæli fjarfundarbúnað í starfsemi sinni.

Í umhverfisuppgjörinu kemur fram að hlutfall endurunnins úrgangs sé 67% af þeim úrgangi sem féll til í starfseminni á árinu 2019 en var 60% árið 2018.

Origo hefur unnið að því síðustu ár að minnka útprentun á pappír í starfsemi sinni með eigin lausn, RentaPrent. Frá árinu 2015 hefur prentun félagsins minnkað um yfir 50% og frá árinu 2018 hefur hún minnkað um 4,2%. Áfram verður unnið að því að gera Origo að fullu pappírslaust í sínum viðskiptum og standa vonir til þess að fleiri viðskiptavinir geti tekið á móti rafrænum skjölum á næstu misserum.

Styrkir við góð málefni

Samfélagsleg ábyrgð skiptir Origo miklu máli og hefur félagið unnið að því að auka samfélagslega ábyrgð sína með margvíslegum hætti. Einn hluti af því eru áherslur félagsins í styrkveitingum sem er beint í styrki í tengslum við ungt fólk, menntun og nýsköpun, sem hafa verið grunnþættir í þeim verkefnum sem félagið hefur styrkt um nokkurt skeið. Auk þess hafa áherslur beinst að því að styðja við jafnréttismarkmið Origo, sem eru m.a. að fjölga konum í upplýsingatækni.

Meðal verkefna sem styrkt hafa verið eru: Forritunarkeppni verkfræðinema, verkefni í samvinnu við Samtök iðnaðarins um kynningu á upplýsingatæknistörfum fyrir grunnskólanemendur og Reboot Hack, sem er háskóladrifið hakkaþon. Einnig hefur Origo verið einn af bakhjörlum VERTOnet, sem eru hagsmunasamtök kvenna í upplýsingatækni. Við leggjum nokkrum öðrum málefnum lið með ýmsum hætti og voru Pieta samtökin m.a. styrkt á síðastliðnu ári í stað jólagjafa til viðskiptavina og voru viðskiptavinir ánægðir með það framtak.

Siðareglur og mannréttindi

Origo hefur sett sér siðareglur sem ná til allra starfsmanna, verktaka og stjórnar félagsins. Reglunum er ætlað að leiðbeina starfsmönnum og stjórn félagsins við framkvæmd daglegra starfa. Lögð er áhersla á heiðarleg samskipti og að komið sé fram við viðskiptavini, birgja, samstarfsmenn og samkeppnisaðila af virðingu. Einnig er mikilvægt að góðir viðskiptahættir séu hafðir í fyrirrúmi og trúnaðarskylda sé virt gagnvart viðskiptavinum, birgjum og öðrum sem stunda viðskipti við Origo. Hlíting við lög og reglur sem varða starfsemi félagsins er Origo mikilvæg og að farið sé eftir þeim innri verklagsreglum sem félagið hefur sett sér. Starfsmenn skuli ekki þiggja gjafir, þjónustu eða annan persónulegan greiða sem ætla megi að hafi áhrif á viðskipti og boðsferðir skulu hafa skýran viðskiptalegan tilgang.

Félagið virðir mannréttindi, rétt allra til félagafrelsis og kjarasamninga. Því til stuðnings hefur félagið sett sér jafnréttis- og jafnlaunastefnu, sjá nánar undir Mannauður.

Hjá Origo er lögð rík áhersla á persónuvernd og friðhelgi einkalífsins, sjá nánar undir Upplýsingaöryggi.

Góðir stjórnarhættir

Stjórn Origo hf. leitast við að viðhalda stjórnarháttum og fylgja „Leiðbeiningum um stjórnarhætti fyrirtækja“ sem Viðskiptaráð Íslands, Nasdaq OMX Iceland og Samtök atvinnulífsins gáfu út. Stjórnin hefur sett sér ítarlegar starfsreglur þar sem valdsvið hennar er skilgreint og verksvið gagnvart forstjóra. Origo er fyrirmyndarfyrirtæki í góðum stjórnarháttum samkvæmt mati Rannsóknarmiðstöðvar um stjórnarhætti við Háskóla Íslands, að undangenginni ítarlegri úttekt Capacent á haustmánuðum 2014. Sjá nánar undir Stjórn og stjórnarhættir.