Origo á tímamótum 2019

Heildarhagnaður Origo var 456 m.kr. á árinu 2019. Tekjur jukust um 8% og EBITDA nam 1006 m.kr. Afkomunni er þó misskipt eftir einingum. Hugbúnaðareiningar voru burðarás í starfsemi Origo á árinu sem sýnir miklar breytingar á lausnaframboði fyrirtækisins og þörfum viðskiptavina, sem nýta sér hugbúnaðarlausnir í síauknum mæli til þess efla þjónustu og rekstur. Segja má að Origo sé á ákveðnum tímamótum en það hefur í gegnum tíðina verið þekkt fyrir sölu og þjónustu á vélbúnaði og tengdum lausnum fremur en hugbúnaðarlausnum.

Sjálfvirkni í ferðalausnum skilar hratt ávinningi

Mikil gróska einkennir starfsemi hugbúnaðareininga Origo, meðal annars í tæknilausnum fyrir ferðaþjónustu, en fyrirtækið hefur lagt mikla áherslu á eigin vöruþróun og sérþróun fyrir flugfélög, ferðaskrifstofur, ferðaskipuleggjendur, gististaði, bílaleigur og bókunarskrifstofur. Ein af lausnum Origo fyrir ferðaþjónustu er Bus Travel Guide sem eykur skilvirkni í rekstri og framkvæmd hópferða. Lausnin samanstendur af umsjónarvef og snjallforritum fyrir hópferðabílstjóra og viðskiptavini. Þá má nefna Paxflow, sem er umsjónarkerfi fyrir ferðaskipuleggjendur, sem er ætlað að efla skilvirkni í rekstri með aukinni sjálfvirkni og tryggja betri upplifun viðskiptavina.

Origo kynnti Cover hótelbókunarkerfið til sögunnar fyrir ári síðan og viðbrögðin hafa verið afar jákvæð. Með Cover er hægt að sjálfvirknivæða hótelin, sem hafa mörg eytt miklum tíma og mannafla í ýmsa handavinnu. Ávinningurinn af Cover kerfinu er mjög sýnilegur og sérstaklega í tekjustýringu, sem er mjög mikilvægur fyrir hótel. Tenging við lausnina tekur skamman tíma og ávinningur af sjálfvirkni skilar sér nokkuð hratt. Lausnin reiknar út verð sjö sinnum á sólarhring og tekur til hliðsjónar verð samkeppnisaðila, eftirspurn, nýtingu viðkomandi hótels og áætlanir um meðalverð.

Mest notaða bílaleigukerfið

Enn önnur ferðalausn frá Origo er Caren, sem er heildarlausn fyrir bílaleigur af öllum stærðum. Með Caren lausninni geta bílaleigur hámarkað flotanýtingu og haft umsjón með heildarferli í rekstri sínum. Með Caren lausninni getur bílaleiga vaktað flotann í rauntíma og fengið skýrslur um akstur og notkun einstakra bifreiða. Caren er mest notaða bílaleigukerfið á Íslandi í dag. Lausnin er einnig í notkun hjá bílaleigum í Evrópu og í Suður-Afríku.

Origo hefur einnig fjárfest í tæknilausnum fyrir ferðaþjónustu sem falla vel að starfsemi Origo. Breska hótelstjórnunarkerfið The Booking Factory (TBF) er dæmi um slíkt en það er heildarlausn fyrir smærri til meðalstóra gististaði. TBF er einföld og nútímaleg skýjalausn sem er í notkun hjá um 250 hótelum og gististöðum í 11 löndum. Lausnin er markaðssett undir eigin nafni erlendis og sem „white label“ lausn á Íslandi undir vörumerkinu Cover.is. The Booking Factory er góð viðbót við lausnaframboð Origo og áherslur á þróun eigin lausna fyrir markaði innanlands og utan.

CCQ tekur flugið

Fjölmargar aðrar eigin hugbúnaðarlausnir hafa slegið í gegn hjá viðskiptavinum Origo og nægir að nefna gæðastjórnunarlausnina CCQ (e. Cloud Compliance & Quality) sem er notendavæn gæðastjórnunarlausn í skýinu og fáanleg í áskrift. CCQ hefur verið afar vel tekið en nú nota lausnina reglulega nálægt fimm þúsund notendur í um 50 fyrirtækjum og stofnunum. Í byrjun árs kom út ný útgáfa af CCQ fyrir minni flugrekstraraðila, undir nafninu Aviaxis og er markaðssetning og sala hafin utan landsteinanna.  

Einnig má nefna mannauðs- og launalausnina Kjarna en notendahópur þeirrar lausnar fer sífellt stækkandi. Origo hefur lagt áherslu á að eiga gott samstarf við notendur Kjarna og þróa með þeim góðar hugmyndir þannig að lausnin haldi áfram að þróast. Meginkrafa notenda er að geta nálgast upplýsingar hvar og hvenær sem er. Einnig er rík krafa um að einfalda verkferla og draga úr handtökum sem skila ekki virði. Þessir þættir eru ofarlega í þróun Kjarna fyrir notendur lausnarinnar og annarra lausna sem fyrirtækið þróar fyrir notendur. Þá hefur Origo þróað nýtt vefviðmóti í Kjarna þar sem aðgengi upplýsinga er enn betra en áður. Vefviðmótið er hægt að nálgast hvaðan sem er og er skalanlegt svo það er sama hvort notandi nálgast það í tölvu eða snjalltæki.  

Origo leggur einnig áherslu á sölu og ráðgjöf við hugbúnaðarlausnir frá þriðja aðila, svo sem SAP og Microsoft Dynamics Business Central (NAV). Stór verkefni voru í vinnslu og önnur í undirbúningi, einkum tengt SAP S/4HANA og að sama skapi jukust umsvif Business Central teymis Origo.

Þess má geta að SAP-ráðgjafateymi Origo var valið samstarfsaðili ársins af UnitedVAR, sem eru samtök 50 leiðandi SAP samstarfsaðila og samanstendur af um 10 þúsund SAP ráðgjafum í 90 löndum. Viðurkenning Origo var fyrir staðbundnar SAP-viðskiptalausnir (on premise).

Mikilvægur styrkleiki Origo felst í þekkingu og þjónustu við fjármálafyrirtæki, en að undanförnu hefur verið fjárfest töluvert í þróun og rekstri stafrænna bankalausna á borð við netbanka, banka-app, hraðbanka- og afgreiðslulausnir. Áskriftartekjur tengdar þessum lausnum munu aukast á næstu misserum. Þá nýtist þessi þekking afar vel við þróun viðbótarlausna fyrir ofangreind viðskiptakerfi. 

Bestun á seðlamagni í hraðbönkum með gervigreind, sjálfvirk sjúkdómsgreining á netinu, viðverukerfi með andlitsgreiningu og sjálfvirk mæling á koffeinneyslu eru þau verkefni sem urðu hlutskörpust á Ofurhetjudögum 2019 og hver veit nema þær lausnir verði að vörum áður en langt um líður.

Þá hefur Origo opnað þróunarsetur í Belgrad í Serbíu en markmiðið með starfseminni er að efla samkeppnishæfni og þróa nýjar hugbúnaðarlausnir fyrir viðskiptavini. Rótina að starfseminni í Belgrad má rekja til kaupa Origo á hlut í Unimaze, sem sérhæfir sig í rafrænum reikningum. Unimaze hafði góðu reynslu af þekkingarsamfélaginu í Belgrad og innviðum þess. Starfsmenn Unimaze og Origo í Belgrad eru nú 10 talsins, allir á sömu skrifstofu sem opnuð var fyrr á þessu ári í hjarta borgarinnar.

Góður árangur náðist í sölu lausna frá Fortinet og Microsoft, en Origo var nýverið valinn Microsoft samstarfsaðili ársins 2020 á Íslandi. Viðurkenningin er fyrir árangur sem Origo hefur náð með viðskiptavinum sínum í þróun og innleiðingu á Microsoft 365 með áherslu á öryggi, samvinnutólið Teams og aðlögun á Azure skýjalausnum fyrir viðskiptavini. Þá varð Origo gull-samstarfsaðili Fortinet fyrir vottanir og sölu frá öryggislausnafyrirtækinu og samstarfsaðili ársins í innviðum og öryggislausnum hjá IBM í Danmörku. Google valdi Origo einnig sem samstarfsaðila á Íslandi fyrir skýjalausnir og G Suite fyrirtækjalausnir árið 2019 en slíkt samstarf tryggir íslenskum fyrirtækjum aðgengi að sérfræðingum í þróun, innleiðingu og rekstri Google lausna. Google er eitt af allra stærstu vörumerkjum heimsins og leiðandi í þróun tæknilausna fyrir einstaklinga og fyrirtæki. Um einn milljarður notar lausnir Google um heim allan. Flestir þekkja vörur eins og Google leitarvélina, Youtube, Android, Maps, Chrome vafrann og G-Mail.

Skýjalausn þróuð eftir þörfum viðskiptavina

Til að mæta þörfum viðskiptavina hefur Origo þróað Aurora DataCloud, sem er afar framsækin og hagkvæm geymslulausn fyrir gögn sem þarf að geyma í miklu magni til langs tíma. Hún var hönnuð fyrir margmiðlunariðnaðinn, til að þjóna sem geymslulausn fyrir myndskeið og hljóð en hefur þegar sannað gildi sitt fyrir annars konar notendur, svo sem flugfélög og söfn. Aurora DataCloud var þróuð með nýstárlegri samsetningu IBM netþjóna, geymslu- og segulbandskerfa til að búa til afar sjálfvirkt, fjölhæft kerfi sem notendur geta valið að nýta á ýmsa vegu. Hún býður viðskiptavinum hagkvæma, áreiðanlega, örugga og umhverfisvæna lausn á vandanum við að vista mikið magn gagna til langs tíma án þess að skerða aðgengi notenda að þeim. Sú staðreynd að raforka á Íslandi kemur alfarið frá jarðhita og vatnsafli þýðir að orkan sem þarf til að keyra Aurora DataCloud er endurnýjanleg – nokkuð sem er sérstaklega eftirsóknarvert fyrir evrópska viðskiptavini sem vilja jafna kolefnisspor sitt. Um leið leggjum við áherslu á að geta boðið okkar eigið ský hér innanlands eða sinna þjónustu fyrir viðskiptavini í gegnum ýmsa samstarfsaðila í skýjaþjónustu hvar sem er í heiminum. Má þar nefna Google, IBM og Microsoft.

Þá eru sífellt fleiri íslensk fyrirtæki sem reiða sig á þjónustu skýjalausna (e Multi-cloud) í daglegum rekstri. Því fylgja fjölmargar nýjar áskoranir sem snúa að stjórnun, öryggi og notkunarmöguleikum slíkra lausna. Þessar áskoranir eru ekki aðeins tæknilegar heldur líka af fjárhagslegum toga og skipta því verulegu máli í rekstri fyrirtækja. Afar einfalt er fyrir fyrirtæki að taka skýjalausnir í notkun, þar sem innleiðingarferli verður sífellt einfaldara, en mikilvægt er að hafa yfirsýn yfir öryggisþætti og kostnað.

Kaupendur að skýjaþjónustu eru tæknistjórar og forritarar, sem eru vaxandi kaupendahópur svo sem að Kubernetes (svokallað „Container Orchestration“ kerfi fyrir „Docker Containers“) gámaþjónustu, sem einfaldar forriturum að færa kerfi á milli skýjaþjónusta.

Gervigreind gegn tölvuþrjótum

Öryggislausnir eru einnig vaxandi þjónustuþáttur hjá Origo og ekki að ástæðulausu. Tölvuþrjótar beina spjótum sínum í síauknum mæli að fyrirtækjum og einstaklingum með margvíslegum hætti. Dæmi eru um að þeir hafi komist yfir gríðarlega háar fjárhæðir, bæði hér heima og erlendis. Því skiptir máli fyrir fyrirtæki að verja umhverfi sitt vel.

Tölvuárásir eru orðnar að þróuðum iðnaði sem öflugur mannskapur stendur að baki. Þess vegna skiptir máli að taka þessi mál afar föstum tökum. Einn angi af þessum ólöglega iðnaði eru svokallaðir svikapóstar í formi falsaðra greiðslufyrirmæla og eru stjórnendur fyrirtækja oftast skotmörkin. Þá beita tölvuþrjótar ýmsum aðferðum (e. Social engineering) til þess að fá tölvunotendur til að slaka á öryggiskröfum eða brjóta öryggisreglur. Sem dæmi reyna þeir að láta líta út fyrir að tölvupóstar komi frá vinum eða samstarfsfólki. Þá geta tölvuþrjótar greint hvort fórnarlambið sé statt í útlöndum því á meðan er auðveldara að framkvæma árásir. Origo leggur mikla áherslu á að verjast árásum á viðskiptavini sína og gegnir greining gagna þar lykilhlutverki. Stafræn gögn fyrirtækja vaxa hröðum skrefum og nota þarf öflug verkfæri til þess að vinna úr og greina allar þær upplýsingar sem berast inn og út úr fyrirtækjum. Með því að samkeyra gögn úr ólíkum öryggisverkfærum má fá rétta mynd af stöðu mála hverju sinni. Þá notar Origo gervigreind til að hjálpa til við að greina mynstur og breytingar á hegðun eða ferli. Gervigreind getur einnig hjálpað við að spá fyrir um óorðna hluti.

Á árinu hlaut Origo tvenn verðlaun hjá IBM í Danmörku. Origo var annars vegar valinn samstarfsaðili ársins í öryggislausnum og hins vegar fyrir gagnaský Origo. Um var að ræða samstarfsaðila IBM í Danmörku og á Íslandi.

Horfur á sviði rekstrarþjónustu og innviða hjá Origo eru góðar. Sala á stærri fyrirtækjalausnum og þjónustusamningum hefur tekið við sér, hagkvæmni í rekstri er meiri og eftirspurn eftir lausnum á sviði öryggis- og skýjalausna og sjálfvirknivæðingu viðskiptaferla hefur aukist verulega. Þjónustulausnir Origo eru í dag vel í stakk búnar til að bregðast við aukinni eftirspurn og veita viðskiptavinum hagkvæma og örugga þjónustu.

Mikill vöxtur í netverslun

Sala á notendabúnaði hefur um langt árabil verið stór þáttur í starfsemi Origo. Ágætis tekjuvöxtur var bæði á fjórða fjórðungi og á árinu í heild (um 20%), að hluta til kominn vegna kaupa Origo hf. á Tölvutek og Strikamerki. Meginskýringin á lakari afkomu en áður er vaxandi samkeppni í sölu á búnaði, þrýstingur á framlegð og hærri rekstrarkostnaður m.a. vegna innleiðingar á keyptum rekstrareiningum. Origo er í sterkri stöðu til að bæta afkomu einingarinnar með því að treysta tekjugrunn og auka hagræðingu í starfsemi. Horft er til þess að hópur tryggra viðskiptavina er bæði stór og öflugur og vörumerki á borð við Lenovo, NEC, Bose, Canon og Sony eiga dyggan fylgjendahóp meðal fyrirtækja og heimila. Unnið hefur verið markvisst að hagræðingu á þessu sviði Origo og sérstök áhersla lögð á að treysta framlegð, út frá nýju skipulagi og áherslum sem munu skila sér í betri afkomu á árinu 2020. Gunnar Zoëga var í október ráðinn framkvæmdastjóri Notendalausna.

Mikill vöxtur er áfram í netverslun, sem skapar tækifæri til að sjálfvirknivæða söluferli enn frekar.

Mikil vinna hefur verið innt af hendi til að efla og styrkja netverslunina og gera hana aðgengilegri. Breytingarnar hafa fallið í kramið hjá viðskiptavinum sem nýta sér æ meira að versla á netinu, en 75% vöxtur var í netverslun árið 2019 miðað við árið á undan. Vörumerkið í netverslun fer ört vaxandi; 80 vöruflokkar, 150 vörumerki og 8000 vörunúmer.

Þegar verslað er í netverslun Origo er hægt að sækja vörurnar í sérstök snjallbox sem eru staðsett fyrir utan verslunina í Borgartúni á hvaða tíma sólarhrings sem er. Öll skilaboð fara sjálfvirkt til viðskiptavinarins sem felur í sér mikinn tímasparnað og þægindi. Viðskiptavinur getur komið þegar honum hentar og er það hluti af aukinni sjálfvirknivæðingu hjá Origo.

Svona er Origo